2022 मध्ये या विशेष ऐतिहासिक स्थळांना नक्की भेट द्या

कर्नाटकमधील बेल्लोर जिल्ह्यात तुंगभद्रा नदीवर हंपी हे सुंदर ऐतिहासिक ठिकाण आहे. युनेस्कोने या ठिकाणाची वर्ल्ड हेरिटेज म्हणून नोंद केली आहे. १३३६ ते १६४६ या कालखंडात विजयनगरची राजधानी म्हणून हंपी शहराची ओळख होती कालांतराने आक्रमणे होऊन आक्रमणकर्त्यांनी हंपी शहराची नासधूस केली. परंतु येथील कलाकृती या आजही अजरामर आहेत. या ठिकाणी राजा अशोकाचे हस्तलिखित शिलालेख देखील आहेत. या ठिकाणी अनेक महल आणि आकर्षक कलाकृतींची मंदिरे पाहावयास मिळतात. यामध्ये प्रामुख्याने विरुपक्षा, विजय वित्तला, हेमाकुता मंदिर प्रेक्षणीय आहे. राजा कृष्णदेवरायाच्या राजदरबाराचे उंच कोरीव कलाकृतींचे खांब, मोठे मोठे हत्ती घोडे, सुंदर स्त्रियांच्या मुर्त्यांमधून साकारलेली संगीत संस्कृती, तेथील बाजार, येथील पर्यटनाचे मुख्यतः आकर्षण आहे. हजाररामा १५ व्या शतकातील मंदिर आहे. रामायणातील भाग या वस्तूवर सुबक रीतीने कोरलेले आहेत. मानले जाते कि रामायण काळात राम लक्ष्मण, हनुमान आणि सुग्रीव यांची येथे भेट झाली होती. या मंदिराच्या बाजूला पुरातत्व विभाग संग्रहालय आहे, येथील उत्खननात सापडलेल्या प्राचीन मूर्ती आणि वस्तू प्रेक्षकांना बघण्यासाठी ठेवल्या आहेत. येथील भव्य हत्तीशाळा बघून विजयनगरच्या साम्राज्याचा अंदाज तुम्हाला येईल. महानवमी डिब्बा, एकावर एक दगडांनी रचलेला ‘दगडी रंगमंच’ सुंदर कलाकृती आहे, जेथे तरुण एकत्रित बसून फोटो काढतात. येथील महालाचे खांब हे संगीत निर्माण करणारे आहेत असे म्हटले जाते. त्यांना हात लावल्यानंतर संगीत ऐकू येते.